​Expertos advirten sobre a obesidade infantil: "O neno non ten que comer coma un adulto"

Expertos galegos en nutrición advirten, para frear a obesidade infantil, do incremento das racións, xa que "o neno non ten que comer como un adulto", así como do cambio de hábitos de vida como o "lecer da pantalla" e a falta de exercicio físico, ademais da "perda de adherencia" á dieta atlántica ou mediterránea.

Así o explicou, en rolda de prensa, a doutora Rosaura Leis, presidenta do comité organizador da XVII Reunión da Sociedade Española de Nutrición, que se celebrará na Facultade de Medicina de Santiago do 3 ao 5 de novembro.

A doutora Leis resaltou que "por primeira vez na historia da humanidade, o sobrepeso e a obesidade superan á desnutrición", o que os expertos atribúen aos cambios de hábitos de vida. Segundo os datos achegados, "un de cada tres nenos" ten na actualidade sobrepeso ou obesidade.

Respecto diso, comentou que o problema do sobrepeso e a obesidade "danse en países do Sur de Europa" o que, segundo sostén a doutora Leis, "alerta" da "perda de peso" das dietas tradicionais como a atlántica e a mediterránea.

Sobre o caso concreto de Galicia, resaltou que con esta situación na Comunidade galega "ponse en perigo a calidade de vida e a lonxevidade". Sobre todo, fixo fincapé en que o "lecer pasivo" dos nenos fronte a pantallas provoca que neste tempo se deixe de "gastar enerxía e se aumente o consumo de produtos non sempre aconsellables ou saudables".

"MOMENTO PARA A ACCIÓN"

Por iso, a doutora Leis incidiu en que "é o momento para a acción" e apostou pola implicación "de todos os Estados da Unión Europea" a favor de estratexias de prevención da obesidade. Con todo, recoñeceu que esta tarefa "non é fácil" porque "vivimos nunha sociedade xeradora de obesidade".

"Temos que estar todos unidos nesta loita", reivindicou a doutora Rosaura Leis, á vez que concretou que esta problemática afecta presenta maior prevalencia nos estratos sociais "máis baixos".

Preguntada sobre se a crise económica influíu no incremento da obesidade, a doutora Leis recalcou que esta "levou a consumir alimentos baixos en nutrientes" por ser "máis alcanzables, de baixo prezo e baixa calidade nutricional". "A crise non axudou a cambiar senón todo o contrario", afirmou.

Así mesmo, advertiu de que "o neno obeso é un adulto obeso". Neste sentido, puntualizou que a obesidade "non é un aumento de peso, é un aumento de masa corporal, porque é a que é metabólicamente activa". Segundo os expertos, nos últimos 30 anos a prevalencia da obesidade infantil "multiplicouse por tres" e "a obesidade en adultos aínda é máis alta".

Deste xeito, aclarou que nos nenos galegos o que supón a obesidade é un incremento do índice de masa corporal, o aumento da circunferencia da cintura e "por tanto o risco é máis alto", xa que "esta graxa corporal produce un dano que terá repercusión a curto, medio ou longo prazo".