A saúde de Yosi obriga a cancelar o concerto de despedida de Los Suaves
Estaba previsto para o 17 de decembro en Ourense e as entradas levaban vendidas meses. O cantante segue en recuperación.
Despois de varios meses nos que Los Suaves tiveron que ir cancelando todos os seus compromisos debido á caída que sufriu o seu vocalista Yosi en pleno concerto no verán en Santander, finalmente suspéndese tamén o seu concerto de despedida, previsto para o 17 de decembro no seu Ourense natal.
"Finalmente e tras esperar que fose posible a celebración do Concerto de Despedida dos Suaves no Espazo ExpOurense na súa cidade natal Ourense, previsto para o vindeiro sábado 17 de decembro e chamado 'El Juicio Final', temos que anunciar, que con todas as entradas vendidas desde hai meses, non vai poder celebrarse", anuncia o comunicado do grupo recolleito por Europa Press.
Nesta liña, Los Suaves explican que "despois de sufrir un gravísimo accidente no escenario na Magdalena en Santander o 22 de xullo último, Yosi segue favorablemente coa súa recuperación, pero non se atopa ao 100% para subirse a un escenario".
Por iso, engaden que "só os médicos poderán dicir cando estará reposto totalmente", e recalcan que "despois de estar ingresado nos Hospitais de Valdecilla e CHOU de Ourense hoxe atópase en tratamento de rehabilitación". "Desexámoslle a Yosi unha satisfactoria recuperación", apostila o texto.
Por último, a banda adianta que "en breve anunciarase a data desde a cal se comezará a devolver o diñeiro aos miles de seguidores que compraron anticipadamente as entradas".
Escribe tu comentario