​O ciberacoso e o suicidio de adolescentes preocupa aos especialistas en psiquiatría

Os primeiros episodios psicóticos, o suicidio ou o ciberbullying representan algúns temas que especialistas en Psiquiatría galegos e asturianos abordarán na XXV Reunión da Asociación Galega de Psiquiatría e o XXI Congreso Astur-Galaico de Psiquiatría que se celebrarán en Ferrol os próximos 11 e 12 de novembro.

Segundo informou a Xerencia sanitaria ferrolá, a cita celebrarase no salón de actos do campus de Esteiro en Ferrol o venres e o sábado baixo a temática global de 'Psicopatoloxía Incipiente'.

A organización resaltou que propón "un tema de especial interese na disciplina" psiquiátrica "e de plena actualidade" como é o "debut da psicopatoloxía dunha poboación moi sensible como é o adolescente e o adulto máis novo".

Ademais, explicaron que quixeron "seleccionar temas actuais e puntos de vista variados da man de clínicos e investigadores de importante impacto rexional, nacional e internacional". A organización indicou que o enfoque dos distintos temas será clínico, investigador e, nalgún caso, tamén xudicial.

No marco deste encontro, que reinirá a especialistas de Psiquiatría en Ferrol, tamén se conmemorará o 25 aniversario da Asociación Galega de Psiquiatría, onde o primeiro presidente da entidade, o psiquiatra Jesús Gómez Trigo Ochoa, fará un percorrido histórico pola mesma.

O encontro comezará o venres ás 11,00 horas cun taller de casos clínicos e terminará o sábado 12 ás 19,00 horas coa conferencia de clausura 'A vocación psiquiátrica de Cervantes. Reflexións ao redor da tolemia e curación pola palabra' do psiquiatra do Hospital Xeral Gregorio Marañón de Madrid David Fraguas Herráez.