​CCOO acusa á Xunta de ter unha "visión distorsionada" de Galicia

O sindicato Comisións Obreiras acusou este xoves á Xunta de ter unha "visión distorsionada" da realidade económica de Galicia para a elaboración dos orzamentos para 2017, á vez que reclamou unha mesa xeral de negociación e un calendario para negociar as contas autonómicas para o próximo ano.

Nun comunicado, o sindicato criticou a decisión da Xunta de convocar para este xoves unha reunión sobre os orzamentos para 2017 que CCOO considerou unha "farsa", dado que "non se presentou ningunha documentación" sobre as contas e o encontro produciuse cando "a decisión xa está tomada", xa que para este venres está convocado o Consello da Xunta que teñen previsto aprobar o anteproxecto de orzamentos autonómicos.

CC.OO. asegurou que esta actitude é unha "falta de respecto do PP cara aos empregados públicos e os seus representantes", tras o que acusou ao Goberno da Xunta de "converter a reunión nun subterfuxio para cumprir cun trámite legal", unha cuestión que non descartan "denunciar xudicialmente".

Sobre o encontro, o secretario de Acción Sindical de CCOO, Xesús Castro, avanzou que será "difícil" que as medidas adoptadas adoptadas pola Xunta resulten "eficaces", xa que "parten dunha visión distorsionada da realidade" de Galicia e "non consideran centrais problemas como o paro de longa duración ou o inaceptable número de persoas que non teñen ningún tipo de prestación social".

Para o sindicato, os orzamentos de 2017 deben dar resposta a "tres cuestións fundamentais", o impulso á actividade económica e á xeración de emprego de calidade, a aposta polo tecido produtivo e a súa diversificación e o reforzo aos servizos públicos e á protección social".

REIVINDICACIÓNS

En particular, CC.OO. trasladou á Xunta que esixen cuestións como que se concreten prazos para reverter os recortes dos últimos anos e se recupere o 5 por cento do salario de 2012 e as cantidades deixadas de percibir como complemento específico no período 2013-2016, así como a recuperación da perda acumulada de poder adquisitivo desde 2010.

En materia de emprego, Comisións instou a eliminar a taxa de reposición de efectivos, a negociar unha "auténtica oferta de emprego público" para 2017 que cubra todas as prazas de persoal funcionario e laboral ocupadas interinamente" e a elaborar un plan de recuperación do emprego público perdido no últimos seis anos, entre outras cuestións.