A oposición critica as dúas caras de Feijóo co galego

O Parlamento de Galicia instou á Xunta a buscar "a implicación do conxunto da sociedade e de diferentes axentes" no fomento o uso do galego entre a mocidade, para o que "se iniciará un proceso de deseño e planificación de políticas de dinamización lingüística".

Este acordo foi aprobado este xoves durante a Comisión de Educación e Cultura por mor dunha iniciativa defendida polo deputado popular César Fernández Gil, que contou cos votos a favor do seu grupo, a abstención do PSdeG e o rexeitamento de En Marea e o BNG.

Na defensa da súa iniciativa, Fernández Gil explicou que o PPdeG entende a lingua galega como "unha ferramenta útil e capaz de afrontar os desafíos que Galicia" ten por diante pero, para iso, considerou "fundamental" involucrar á sociedade no seu uso e, especialmente á "mocidade".

Con todo, na sesión na que tamén foi debatida outra iniciativa sobre o uso do galego presentada por En Marea e rexeitada polo grupo popular, a deputada do partido instrumental, Ánxeles Cuña, lamentou que o PPdeG propoña "por unha banda fomentar o uso do galego, e por outra, co mantemento do decreto do plurilingüismo, o acurrale".

Por iso, pediu ao Partido Popular que deixe ver "que interese real" ten en fomentar que os máis novos falen galego e censurou que as súas "actuacións hostís" teñan "un efecto claro sobre" este idioma que é, como lamentou, "que as persoas que o falan son cada vez menos e maiores".

DERROGACIÓN DO DECRETO DO PLURILINGUISMO

Nesta liña tamén se pronunciou a deputada nacionalista Olaia Rodil, quen asegurou que durante a pasada lexislatura a Xunta "non fixo nada" para "fomentar o uso do galego entre a mocidade".

"Se queremos reforzar positivamente o uso do galego e transmitir unha mensaxe positiva, haberá que derrogar o decreto do plurilingüismo, porque estamos a lanzar mensaxes contraditorias aos mozos", asegurou a parlamentaria do Bloque.

Esta idea tamén foi apoiada pola deputada socialista, quen asegurou "compartir" o asombro de Olaia Rodil ante a iniciativa presentada polo Grupo Popular despois de dúas lexislaturas "nas que o Goberno galego non fixo absolutamente nada en dinamización lingüística".

OUTRAS INICIATIVAS

Na comisión deste xoves tamén foron rexeitadas cos votos en contra do PPdeG dúas iniciativas presentadas por En Marea e o PSdeG. En concreto, non viu luz verde unha defendida pola deputada Luca Chao sobre as avaliacións finais de ESO e Bacharelato, así como outra formulada polo portavoz parlamentario do PSdeG, Xoaquín Fernández Leiceaga, para dotar dun ximnasio cuberto ao CPI Camiño de Santiago do Pino (A Coruña).