​“2016 foi un ano desastroso para os Dereitos Humanos”

O xefe dos Dereitos Humanos das Nacións Unidas, Zeid Raad al Husein, vén de alertar de que os Dereitos Humanos “están baixo unha presión sen precedentes” en todo o mundo debido ao auxe do extremismo. Estas declaración fainas no marco do día internacional sobre a materia, que se celebra este sábado.

“2016 foi un ano desastroso para os Dereitos Humanos en todo o mundo e, se a crecente erosión do sistema humanitario que construimos coidadosamente segue aumentando, ao final sufriremos todos”, dixo no seu discurso difundido con motivo deste 10 de decembro.

Al Husein non ocultou o seu temor pola “deriva que está tomando o mundo”. “Os movementos extremistas someten á xente a unha violencia horrible. Os conflitos e a pobreza expulsan ás familias dos seus fogares. O cambio climático escurece os nosos horizontes”.

“INTERESE DE TODOS”

Tamén o Secretario Xeral das Nacións Unidas, Ban Ki-Moon, sinalou na súa mensaxe polo Día Internacional dos Dereitos Humanos, que "defender os dereitos humanos vai en interese de todos" xa que o seu respecto promove "o benestar das persoas, a estabilidade das sociedades e a harmonía deste mundo tan interconectado".

Así mesmo, o diplomático lembrou que os dereitos humanos son "o eixo do labor e a identidade das Nacións Unidas" e asegurou que no momento actual no que"os conflitos se multiplicaron, do mesmo xeito que as necesidades humanitarias e o discurso do odio", a Declaración Universal de Dereitos Humanos establece que "a liberdade, a xustiza e a paz no mundo teñen por base o recoñecemento (...) dos dereitos iguais e inalienables de todos os membros da familia humana". "Paso a paso, podemos construír un futuro cimentado nos nosos valores comúns de igualdade e dignidade humana", sinalou.

Así, Ban lembrou a campaña 'Xuntos' que lanzou a ONU para loitar contra a xenofobia á que se enfrontan tantos refuxiados e migrantes e incidiu en que todas as persoas, "en cada un dos niveis da sociedade", poden levar a cabo o labor de "defender e promover" os dereitos humanos das persoas que están ao redor.

"Os Estados teñen a responsabilidade primordial de defender os dereitos humanos, e as Nacións Unidas, xunto cos seus asociados do mundo enteiro, deben seguir reforzando as respostas aos abusos e traballar mellor para previr as crises de dereitos humanos", engadiu.

Por último, Ban tamén mencionou a última campaña da Oficina de Dereitos Humanos das Nacións Unidas, 'Defende hoxe os seus dereitos!' que pide a todos os cidadáns que, estean onde estean, pode influír en favor dos dereitos humanos: no barrio, na escola, no traballo, nos medios sociais, na casa e mesmo nos campos de deporte de todo o mundo. "Xuntos, defendamos os dereitos dos demais, hoxe, mañá e todos os días", concluíu.