O SLG reclama á Dirección de Minas a caducidade das concesións a Erimsa na Terra Chá

|

TerrachanconcesionsminasSLG

// Sindicato Labrego Galego


A coordinadora do Sindicato Labrego Galego na Terra Chá, Margarida Prieto Ledo, vén de solicitar unha xuntanza co persoal responsable da Dirección Xeral de Enerxía e Minas para aclarar os motivos polos que a Consellaría de Economía, Emprego e Industria non declara as caducidades das concesións mineiras a Erimsa en concellos como A Pastoriza, Cospeito, Castro de Rei, Abadín, Riotorto e Vilalba.


Segundo indica o sindicato nun comunicado, o pasado 5 de abril, presentouse diante da dita Consellaría unha solicitude para que se iniciase o expediente para declarar as caducidades das concesións mineiras Pastoriza 5562, Alicia 5917 e Karles 5919. Porén, pasados seis meses, "Industria segue sen contestar", polo que o colectivo di "ignorar se se iniciou o procedemento para declarar estas caducidades ou non".


Dende o Sindicato Labrego Galego lamentan o "silencio administrativo", e reivindican que "está en xogo o futuro dunha extensa área de grande valor agropecuario da que depende a economía de centos de familias labregas". 


SENTENZA DO TSXG


O sindicato labrego fai referencia no seu comunicado á recente sentenza do Tribunal Superior de Xustiza de Galiza (TSXG) contra Erimsa, que "desestimou o recurso contencioso-administrativo que interpuxo mineira norueguesa contra a denegación, por parte da Consellaría de Medio Ambiente, da autorización para explotar Alicia, N.5917". 


Nesta sentenza, segundo o colectivo, as probas periciais que se achegan sobre o impacto ambiental negativo en 3.399.997 m² falan dunha “relevante afectación á estrutura agrolóxica do terreo (…) que incorpora un solo de alta produtividade agrícola ou gandeira, característico do solo rústico de protección especial agropecuaria, e concorre no seu espazo a recente concentración de Goá (Cospeito), o que afecta 852 hectáreas, existindo ocasionalmente carballos e castiñeiros, afectando de forma relevante á estrutura viaira, tres vías da rede primaria complementaria e dúas da rede provincial secundaria, así como canles hidrolóxicas e zonas inundables do Miño, Anllo, Guisande, Pequeno, Pequeno de Anllo, Rego de Ribela, Rego de Pumar, Rego de Albán e humidais de Arneiro e As Barcias, e un espazo natural do Río Anllo e enclaves arqueolóxicos de O Castro, túmulos de Rodís e Froilán”.


En virtude desta sentenza desestimatoria dunha das tres concesións, e do "enorme impacto probado que tería a explotación mineira de cuarzo na Terra Chá pretendida con Erimsa", dende o Sindicato Labrego Galego entenden que a Dirección Xeral de Enerxía e Minas debe declarar a caducidade das concesións mineiras a Erimsa na Terra Chá "de maneira inmediata" e piden que non se siga adinado unha decisión da que "depende o futuro social e económico dunha das comarcas agrogandeiras máis ricas e importantes de Galiza".

relacionada O CSIC e a USC implementan técnicas de fitocorrección en zonas mineiras galegas
relacionada ​A Xunta asegura que “contestou con toda contundencia” a demanda da mineira de Corcoesto

Sin comentarios

Escribe tu comentario




No está permitido verter comentarios contrarios a la ley o injuriantes. Nos reservamos el derecho a eliminar los comentarios que consideremos fuera de tema.
Este periódico fue seleccionado por Google News Initiative para su Journalism Emergency Relief Fund

Pressdigital
Plaza de Quintana ,3 15704 Santiago de Compostela
Tlf (34)678803735

redaccion@galiciapress.es o direccion@galiciapress.es
RESERVADOS TODOS LOS DERECHOS. EDITADO POR POMBA PRESS,S.L.
Aviso legal Cookies Consejo editorial Publicidad
Powered by Bigpress