​Aparece no mar o corpo dunha muller afogada en Cambados

Sospéitase que a muller caeu á auga cando paseaba. //Foto: Emerxencias Galicia

Unha muller de 75 anos faleceu afogada este domingo pola mañá en Cambados (Pontevedra) tras caer á auga mentres paseaba pola zona do porto.

Segundo indicaron fontes do dispositivo de emerxencias a Europa Press, o suceso produciuse ao fío das 9,30 horas deste domingo, cando a anciá saíu a pasear. En concreto, os membros deste corpo recibiron a alerta por parte da Policía Local para que recuperasen o cadáver da señora, que estaba a flotar na auga.

Con todo, non foi preciso que Protección Civil despregase a liña subacuática, pois, ao parecer, un operario do Concello recolleu o corpo sen vida da anciá cunha lancha e transportouno ata o porto, onde tamén chegou unha ambulancia --o persoal sanitario só puido certificar o falecemento da anciá, que morreu afogada--.

Segundo relataron as mesmas fontes, preto do lugar onde apareceu o corpo da anciá, foron achados unha pañoleta e un bastón apoiado nunha varanda, polo que se cre que a muller puido caer ao achegarse á auga para coller unha pouca ou lavar a cara e as mans.

A auga non chegaba a cubrir do todo no lugar onde apareceu o cadáver da anciá, tal e como puideron corroborar os efectivos de emerxencias desprazados ata alí.