O Goberno central motivou o atraso da publicación do informe sobre o accidente de Angrois

Unha alegación de última hora do Goberno central motivou o atraso da publicación do informe que elaborou a Axencia Ferroviaria Europea sobre o accidente do tren Alvia en Angrois, que analiza a falta de independencia da Comisión de Investigación de Accidentes Ferroviarios (CIAF).

Así consta nun correo electrónico remitido polo director executivo da axencia á plataforma de vítimas.

De feito, o presidente dese organismo europeo decidiu inhibirse, ao existir esa alegación, e o director executivo da axencia ferroviaria pediu aos afectados un prazo a maiores de 15 días para concluír se o documento se fará público, como marcan as normas de transparencia da Unión Europea, ou se, pola contra, non se dará a coñecer.

"Poderei tomar unha decisión final o 8 de xullo", indica Josef Doppelbauer, o director executivo da Axencia Ferroviaria Europea, na mesma liña da comunicación que a Comisión Europea trasladou á portavoz do BNG en Bruxelas, Ana Miranda, a semana pasada.

No seu correo, o pasado venres 17 de xuño, Doppelbauer indicou ao presidente da Plataforma Vítimas Alvia 01455, Jesús Domínguez, que necesitaba aínda "máis tempo" para clarificar se é posible aterse ás excepcións que contempla a regulación sobre transparencia para non divulgar o informe.

En resposta a isto, este luns 20, Domínguez mostrou a súa desconformidade con que esta alegación de última hora está, ao seu xuízo, "deseñada para impedir a publicación", algo que ve na liña do "bloqueo" da creación dunha comisión de investigación parlamentaria por parte do PP e o PSOE.

"DESESPERADOS POR COÑECER A VERDADE"

Con todo, as vítimas asumen que terán que agardar, pero fan un chamamento para asegurarse de que finalmente o documento será divulgado, tendo en conta que os familiares e sobreviventes están "desesperados por coñecer a verdade" dun sinistro que, o pasado 24 de xullo de 2013, ocasionou 80 mortos e máis dun centenar de feridos.

O propio luns, o director executivo da axencia contestou ao representante do colectivo que este organismo ten a obrigación de ser "neutral" e, tras mostrar a súa comprensión coas vítimas, agregou que debe resolver as peticións das partes coa dilixencia que corresponde.

"Como vostede, nós confiamos en que o proceso será obxectivo e transparente e que as vítimas e os seus familiares coñecerán finalmente a verdade", finaliza o intercambio de mensaxes.