​CCOO esixe que se convoquen 3.500 prazas no Sergas para reducir a alta temporalidade

A Federación de Sanidade de CC.OO. en Galicia esixiu á Administración galega a convocatoria dunha oferta pública de emprego (OPE) excepcional para "terminar coa precariedade laboral" no Sergas.

A petición do sindicato fai referencia a recentes sentenzas do Tribunal Superior de Xustiza da Unión Europea, que declara "contrario á normativa comunitaria" o encadenamiento de contratos "que practican, entre outros, os servizos autonómicos de saúde".

O secretario xeral de CC.OO-Sanidade, Anxo Cameselle, lembrou que o sindicato "leva anos denunciando estas prácticas", porque "precarizan a actividade laboral" cubrindo "necesidades permanentes" con "contratos sucesivos".

Na mesa sectorial que se celebrará este venres, día 7, CC.OO. demandará unha oferta de emprego público de carácter excepcional con 3.500 prazas, que permitiría reducir a porcentaxe de temporalidade, que é actualmente do 30 por cento.

RECLAMACIÓN DE ASMIG

Por outra banda, a Asociación de Médicos Interinos de Galicia (Asmig) presentou este xoves na delegación coruñesa do Sergas o primeiro escrito en Galicia para reclamar que se adopte a sentenza do tribunal da UE relativa á homologación de interinos e fixos no relativo a indemnizacións por despedimento.

Así, no escrito solicítase a apertura dun procedemento administrativo que conduza á condición de indefinido de traballadores ata agora en posesión dunha praza con vínculo laboral eventual estatutario. De non atender á reclamación, a asociación non descarta acudir á xustiza.