En Marea dille á Xunta que presente "toda a documentación" da fusión das caixas
O PPdeG anunciou onte a súa intención de reabrir a comisión de investigación sobre as caixas de aforro galegas.
En Marea celebra que o PPdeG anuncie a súa intención de reabrir a comisión de investigación sobre as caixas de aforro galegas despois de "tres anos de bloqueo do Grupo Parlamentario Popular" ao traballo da devandita comisión e tras "negarlle á oposición información, comparecencias e documentación transcendente".
E é que este venres o Grupo Parlamentario Popular pediu que se reactivase a comisión de investigación sobre as caixas galegas para que os cidadáns poidan coñecer as conclusións do traballo realizado neste órgano parlamentario durante a pasada lexislatura e que así se poida saber "o que pasou" con estas entidades financeiras.
DOCUMENTOS BLOQUEADOS
"Solicitamos que nesta ocasión si se ofrezan os documentos bloqueados na pasada lexislatura, como a carta de encarga da Xunta á auditora KPMG, os informes dos técnicos de Facenda sobre a fusión, toda a documentación dispoñible sobre o proceso de venda de Novagalicia Banco e, moi especialmente, todos os informes e documentos que estaban encima da mesa do Consello da Xunta do 18 de novembro de 2010, no que se autorizou a fusión de Caixa Galicia e Caixanova", relataron a través dun comunicado desde En Marea.
Así, o viceportavoz do Grupo Parlamentario de En Marea, Antón Sánchez, considera que se o goberno da Xunta "segue negando esta información clave para esclarecer un proceso que finalizou nun auténtico espolio do aforro de moitos galegos e galegas", entón "quedará claro unha vez máis a intención de controlar a Comisión para evitar que se determinen os responsables políticos deste roubo".
"Desde En Marea esixirémoslle tamén ao señor Feijóo unha explicación do por que durante tres anos se mantivo paralizada a Comisión de Investigación e se agardou a que pasen as eleccións para anunciar a reapertura", finalizou.
Escribe tu comentario