​Críticos de Podemos Galicia rexistran o partido 'Podemos 15M'

Os críticos de Podemos Galicia que están en contra da alianza coas mareas rexistraron un novo partido co nome de Podemos 15M. A súa finalidade é contar cun "espazo propio fóra da Marea" e non descartan presentarse con estas siglas ás próximas citas electorais. Dependerán do resultado do congreso de Vistalegre e do camiño que siga o partido.

Os promotores son secretarios municipais con cargos en vigor, outros xa dimitidos e militantes a nivel individual. A formación leva rexistrada no Ministerio de Interior desde decembro, coa intención de garantir que "Podemos sexa federal, polo menos en Galicia" e que exista "nas próximas citas electorais unha papeleta representando o partido fóra da Marea".

Este grupo de críticos tamén cargan contra a xestión de Carmen Santos á fronte da dirección e acúsana de non render contas, ademáis de levar "máis de 100 días desde as eleccións galegas sen convocar unha asemblea xeral que estaba comprometida desde antes dos comicios electorais".