​Outro chanzo para o gran grupo lácteo

|

Cooperativasgalegasleite


As asembleas das cooperativas galegas Feiraco, Os Irmandiños, Melisanto e Xallas deciden este luns, 31 de outubro, se se integran nun grupo de referencia no sector lácteo.

A partir do mediodía comezarán as votacións nas que os cooperativistas terán a potestade de dar luz verde ou non a un grupo lácteo que xa foi validado polos consellos reitores de Feiraco, Os Irmandiños, Melisanto e Xallas a comezos de outubro.

No caso de que algunha das catro vote polo non, o proxecto seguirá adiante a condición de que polo menos tres cooperativas votasen a favor. Tras iso, entre novembro e decembro está previsto que se proceda á constitución da nova cooperativa e inscrición no rexistro. Se sae adiante, o comezo de operacións prevese a partir do 1 de xaneiro de 2017.

O obxectivo desta unión é gañar volume e conseguir unha maior eficiencia coa integración de servizos e o abaratamento de custos, no marco dun mercado de leite marcado pola volatilidade de prezos. Arrinca con catro cooperativas, pero está aberta á incorporación de máis, co único requisito dun capital mínimo de dous millóns de euros.

No momento da presentación desta iniciativa, o presidente de Feiraco, José Montes, definiuna como "unha luz que se abre no ámbito que sempre se propuxo Galicia" a través de "sucesivas administracións", "de todos os partidos políticos", que "tiveron sempre como reto isto".

RADIOGRAFÍA DA UNIÓN


Feiraco, Os Irmandiños, Melisanto e Xallas integraríanse así nunha cooperativa de segundo grao, na que cada unha manterá o seu nome sen que haxa unha fusión, que operará a nivel autonómico, pero con miras ao Noroeste estatal, co obxectivo de estruturar o sector en Galicia e apostar pola reindustrialización.

De tal forma, no caso de que se peche o proxecto agrupará a 4.340 gandeiros que producen 410 millóns de litros de leite --150 millóns destes litros procésanse nas cooperativas, que saen ao mercado co nome de Feiraco e Clesa--, co obxectivo de ocupar o 20% da produción galega. Ademais, elaborarán nas súas fábricas 240.000 toneladas de pensos e forraxes.

No último exercicio, a facturación agregada das catro cooperativas foi 196 millóns de euros --todas con contas saneadas en 2015--, mentres que este proxecto nacerá con máis de 37 millóns de fondos propios --Feiraco (17 millóns), Irmandiños (11,6 millóns), Melisanto (4,7 millóns) e Xallas (4,3 millóns).

Existe o compromiso de manter o cento por cento do emprego, cun persoal total próximo aos 400 traballadores.

Na actualidade, Feiraco conta con 1.978 socios e 208 traballadores; Os Irmandiños, 927 socios e 94 traballadores; Xallas, 781 socios e 22 traballadores; e Melisanto, 656 socios e 37 traballadores.

relacionada ​Catro cooperativas galegas queren integrarse nun grupo lácteo
relacionada Feiraco e as cooperativas dedican un día ao empoderamento das mulleres do agro

Sin comentarios

Escribe tu comentario




No está permitido verter comentarios contrarios a la ley o injuriantes. Nos reservamos el derecho a eliminar los comentarios que consideremos fuera de tema.
Este periódico fue seleccionado por Google News Initiative para su Journalism Emergency Relief Fund

Pressdigital
Plaza de Quintana ,3 15704 Santiago de Compostela
Tlf (34)678803735

redaccion@galiciapress.es o direccion@galiciapress.es
RESERVADOS TODOS LOS DERECHOS. EDITADO POR POMBA PRESS,S.L.
Aviso legal Cookies Consejo editorial Publicidad
Powered by Bigpress