A CIAF entrevistará a maquinistas para avanzar no seu informe sobre o accidente do Porriño

A comisión de investigación de accidentes ferroviarios (CIAF) ten previsto realizar entrevistas a semana que vén en Vigo en relación co accidente do tren Celta o pasado 9 de setembro á chegada da estación do Porriño, segundo informaron fontes consultadas por Europa Press.

Un xefe de maquinistas portugués e un compañeiro do condutor falecido --tamén luso-- serán algúns dos entrevistados, que están citados na estación de Guixar.

As fontes consultadas remarcan que estas tarefas van na liña do que establece a normativa europea para a elaboración do correspondente informe sobre as causas dun sinistro ferroviario. E é que o labor da CIAF foi posta en cuestión no seu día pola Axencia Ferroviaria Europea pola súa achega no sinistro de Angrois, tras as demandas trasladadas a Bruxelas polo colectivo de vítimas.

No Porriño morreron catro persoas e máis de 40 resultaron feridas, no descarrilamento dun convoi que, ao ser desviado a unha vía secundaria, debía reducir a velocidade desde os 120 quilómetros por hora aos 30.

Este luns, un perito xudicial e un responsable da CIAF traballaron sobre o terreo para solicitar datos que permitan elaborar unha simulación do accidente, que se prevé que estea lista no prazo duns dous meses.

Estes labores desenvólvense antes de que Adif repare a vía, algo para o que xa recibiu o permiso da xuíza, e que quere iniciar canto antes, segundo fontes consultadas.

RENUNCIA DE LAMELA

Por outra banda, e tras a renuncia do enxeñeiro industrial José Manuel Lamela, vai ser designado outro perito na causa, e a xuíza pediu un enxeñeiro de telecomunicacións.

A Xunta, que é a quen compete prover peritos nos procedementos, estuda se dispón dun ou se recorre á lista do colexio.

O MAQUINISTA NON FREOU

As primeiras inspeccións do tren sinistrado concluíron que o sistema de freado funcionaba correctamente, pero o certo é que o maquinista non minorou a marcha, a pesar de que recibiu dous avisos 'L1' (para reducir a velocidade) e confirmou que os recibía.

En todo caso, os técnicos seguen desenvolvendo o seu labor e, ademais do tren, estudan as condicións da vía e de elementos concretos, como os encravamentos (os sistemas que fan que os trens vaian por unha vía e non por outra).

ANOMALÍA NA VÍA

Na vía secundaria onde foi desviado o tren estaban a realizarse comprobacións, posto que o día anterior detectouse unha anomalía.

Precisamente, o desvío a esa vía secundaria obrigaba ao tren para circular a 30 quilómetros por hora. O convoi non tiña parada prevista no Porriño e, en circunstancias normais, pola vía principal, atravesa ese tramo férreo a uns 120 quilómetros por hora.

Adif, pola súa banda, defende que estas probas son "habituais" e asegura que se desenvolven case diariamente en distintos puntos da rede ferroviaria española.

Por outra banda, Adif nega que tivese "ningunha vontade de ocultación" na causa que investiga o descarrilamento da curva da Grandeira, onde morreron 80 persoas, despois de que achegase 300 folios ao xulgado de documentos que ve "relevantes" pero que había omitido no seu día, segundo di, "por erro".